A Banda de Música de Chapela conmemora o seu 30 aniversario cun concerto especial de bandas sonoras que terá lugar este sábado, 22 de febreiro, no Multiúsos de Chapela. A actuación será de entrada libre ata completar aforo e servirá para celebrar tres décadas de traxectoria musical, marcadas por actuacións dentro e fóra de Galicia, premios en certames e colaboracións destacadas.
Tres décadas de música e recoñecementos
Fundada en 1995, a Banda de Música de Chapela realizou o seu primeiro gran fito xa no seu ano de nacemento, cunha xira por Venezuela que a levou a tocar en varias cidades do país. Desde entón, a agrupación percorreu Galicia e España, con actuacións en Portugal, Asturias, Castela e León, Murcia ou Madrid.
No seu palmarés destaca a participación no XI Certamen Nacional de Bandas de Música Ciudad de Murcia no ano 2001, onde acadaron un meritorio segundo premio, e o seu paso por diferentes edicións do Certame Provincial de Bandas da Deputación de Pontevedra, onde lograron recoñecementos en varias ocasións. Tamén representaron a Galicia en eventos como o I Encontro de Bandas de Música Españolas en Marina D’Or en 2009.
En 2010, a banda obtivo o segundo premio no Certame Galego de Bandas de Música e, ese mesmo ano, logrou o primeiro premio na sección zonal da Deputación de Pontevedra. No ámbito cultural, destaca a súa participación na X edición do Festival Nacional de Curtametraxes “Redondela en Curto”, cun concerto especial de bandas sonoras.
Colaboracións e proxectos innovadores
Ao longo destes anos, a Banda de Música de Chapela colaborou con recoñecidas figuras e agrupacións musicais. Acompañou á soprano Nuria Lorenzo na gravación do seu primeiro disco e estreou obras inéditas do compositor galego Reveriano Soutullo en 2013. En 2014, presentou Poema de Arealonga, unha obra encargada ao compositor Ángel Montes como homenaxe á parroquia de Chapela.
Nos últimos anos, destacou pola súa fusión con outros estilos musicais e espectáculos. En 2016 e 2017, compartiu escenario co grupo de percusión Odaiko en concertos organizados polo Concello de Redondela. En 2018 e 2019, participou no Concurso Internacional de Baile Vigo-Porte, onde estreou espectáculos como Carmina Burana e Música e Danzas do Mundo. No ano 2020, reuniu a máis de 2.000 espectadores no paseo de Chapela co concerto Pelepau Sinfónico, xunto ao grupo tradicional Pelepau.
Unha batuta con historia
A dirección da banda pasou por varias mans nestes 30 anos. O seu primeiro director foi Carlos Díaz Álvarez, seguido por Lourenço Filipe da Silva Cruz (2000-2003), Francisco Abla Rosales (2003-2006), Severino Pedrosa Núñez (2007-2010) e Santiago Barreiro Davila, un dos directores máis novos de Galicia naquel momento, quen deixou a batuta en 2014. Desde entón, a dirección recae en Ándres Álvarez Hernández, que continúa ao fronte da formación.
Con este concerto de bandas sonoras, a Banda de Música de Chapela reafirma o seu compromiso coa cultura e a música, celebrando un legado de tres décadas cheas de éxito e emoción.
