Co inicio das obras na perigosa curva de Trasmañó, na N-552, a senadora do BNG, Carme da Silva, insta ao Goberno a garantir alternativas viarias que eviten atascos entre Vigo e Redondela. Entre as medidas propostas, destaca a eliminación das cabinas de peaxe na AP-9, considerando que a infraestrutura “xa foi pagada polos galegos e galegas”.
Da Silva lembra que, grazas aos acordos de investidura impulsados polo BNG, o tramo entre Vigo e Redondela é gratuíto, pero só a través de telepeaxe. Por iso, reclama que se faga efectiva “unha demanda histórica da veciñanza” coa retirada das cabinas, especialmente agora que as obras na N-552 provocarán importantes problemas de circulación. O BNG tamén solicita información sobre o prazo de execución das obras e as medidas previstas polo Ministerio de Transportes para garantir a mobilidade na zona.
