Pazos de Borbén celebra con grande orgullo o triunfo do seu veciño Roi Rodríguez, quen con tan só 20 anos, foi o gañador da segunda edición do programa de selección de pilotos “Máis Talento Motor” da Deputación de Pontevedra. Grazas ao seu talento e dedicación, Roi terá a oportunidade de competir pilotando un Dacia de AMF Motorsport nas cinco probas puntuables da Sandero Eco Cup Galicia 2025.
A final desta edición do programa tivo lugar no circuíto de A Madalena, en Forcarei, onde Roi fixo un tempo de 1:51.027, gañando a vitoria por unha diferencia de apenas medio segundo. Un logro impresionante que demostra a súa destreza e forza de vontade no mundo do motor.
Desde o Concello de Pazos de Borbén, o alcalde Luciano Otero e todo o equipo de goberno quixeron felicitar a Roi por este destacado logro. “É un exemplo de superación e talento, e leva o nome do noso concello ao máis alto”, expresaron.
A primeira proba puntuable da tempada será o Rallye Mariña Lucense, no marco do Campionato Xunta de Galicia de Rallyes – Recalvi, e todo Pazos de Borbén estará ao seu lado, seguindo e apoiando o seu percorrido nesta emocionante tempada de competición.
