O conselleiro de Educación, Román Rodríguez, visitou este luns o Colexio de Reboreda para supervisar o resultado do cambio de fiestras e portas realizado no centro. Unha obra dotada con máis de 326.000 euros enmarcada nun conxunto de actuacións nos centros educativos de Redondela, sendo a máis relevante a ampliación do Instituto IES Pedro Floriani, cun orzamento de case 2M€.
Rodríguez destacou que o total das obras superan os 3M€ e forman parte das actuacións do marco do Plan de nova arquitectura pedagóxica. Así o afirmou nunha visita ao Colexio CEIP Plurilingüe de Reboreda, onde comprobou o resultado das obras de cambio de fiestras e portas e sinalou que as obras acometidas nos últimos anos nos centros deste concello “inclúen desde a ampliación dun instituto ata melloras cambios de cuberta e carpinterías exteriores e mesmo unha instalación fotovoltaica”.
Cun orzamento de máis de 326.000€, a actuación en Reboreda supuxo mudar un total de 176 ventás e portas. As novas carpinterías son de aluminio con rotura da ponte térmica e dobre acristalamento, o que permite mellorar a eficiencia enerxética e o confort do edificio.
O titular do departamento educativo da Xunta sinalou como a actuación de maior envergadura a ampliación do Instituto IES Pedro Floriani, que conta cun orzamento de case 2M€ e que está en execución. O remate desta obra está previsto para finais deste curso.
Así mesmo, ademais da obra do Colexio de Reboreda, está rematado tamén o cambio de fiestras do CEIP Outeiro das Penas (375.000€), a renovación do sistema de calefacción por biomasa no IES Mendiño (242.000€), a substitución da cuberta da pista deportiva do CEIP Plurilingüe de Cedeira (124.000€), así como a mellora do illamento térmico e acústico do ximnasio e instalación solar fotovoltaica no IES Illa de San Simón (70.000€), entre outras
