A futbolista Zaira Martínez con tan só 14 anos de idade vén de ser convocada coa Selección Española de Fútbol. Comezou a súa traxectoria en equipos base de Redondela e, nos últimos anos, compatibilizou o fútbol sala no Campito Chapela co fútbol no Val Miñor e forma parte da Selección Galega. A súa chamada para representar a España supón un recoñecemento ao seu traballo constante e á súa progresión dentro do fútbol feminino.
A nova convocatoria de Zaira reflicte o avance do fútbol feminino e confirma que cada vez son máis as rapazas que atopan no deporte unha oportunidade para brillar. O seu soño de xogar en Primeira División e consolidarse na Selección Española está agora máis preto de facerse realidade.
A futbolista recibiu o diploma “Orgullo redondelán” e a insignia do Concello de mans da alcaldesa, Digna Rivas, e o concelleiro de Deportes, Iván Valles, como recoñecemento polo seu traballo e méritos deportivos. No acto a xogadora estivo arroupada pola súa familia, entre eles a súa irmá Naiara, tamén futbolista e que milita en As Celtas.
Para a alcaldesa é “un luxo” que este municipio conte con deportistas “tan novas e ao máis alto nivel do fútbol nacional”. Tanto a rexedora como o concelleiro felicitaron a Zaira polos seus logros “que son un exemplo para todas as nenas”. Desde o Concello de Redondela desexámoslle “moita sorte” para o Campionato de España Fase Ouro que xogará esta fin de semana en Zaragoza, no que tamén participa a redondelá Lucía Salceda
