Foto de Miguel A. Domínguez
A remontada xa está en marcha: o xuvenil do Choco colle aire na elite
O equipo xuvenil do CD Choco de Redondela está a vivir unha tempada de altibaixos na División de Honra Xuvenil, a máxima categoría nacional, pero os últimos resultados devolveron a esperanza a Santa Mariña. Tras un inicio complicado que situou ao equipo nos postos baixos da clasificación do Grupo 1, un refacho de tres empates e dúas vitorias consecutivas permitiu ao equipo escalar posicións e asentarse no 11º lugar, un impulso clave na súa loita pola permanencia.
O punto de inflexión chegou cunha contundente vitoria a pasada fin de semana fronte ao Club Bansander de Cantabria, ao que derrotaron por 3-1 nun partido vibrante que mostrou a garra e o talento dos mozos de Redondela. Este triunfo, sumado aos empates recentes –como o 2-2 contra o Arosa Sociedad Cultural – e outra vitoria anterior contra o SD Compostela, cambiou a dinámica do equipo, que agora mira con optimismo o resto da tempada 2024-2025.
O equipo xuvenil do CD Choco, que compite na División de Honra Xuvenil fronte a clubes de renome como o RC Celta ou o Deportivo da Coruña, consolidou a súa valía na súa estrea na categoría a pasada tempada e mantén como gran obxectivo a permanencia. Este reto afróntao agora baixo a dirección de Miguel Ángel Domínguez Formoso, un adestrador vigués con ampla experiencia tras o seu paso por equipos sénior como o Arosa SC en Terceira División (2021-2024) ou o CP Alertanavia en Preferente. Para Domínguez, debutar na formación de base supón unha nova aventura, pero asume o proxecto con ilusión, atraído polo elevado nivel do equipo e pola capacidade do CD Choco para fortalecer a súa canteira e preservar a historia e o prestixio dun club referente en Galicia.
Para o adestrador, o punto forte do equipo reside nunha plantilla que prioriza o concepto de equipo por riba de todo. A filosofía do Choco de apostar polo talento local segue dando froitos, o que reforza a identidade do club. “Estamos orgullosos de como están a responder os mozos. A permanencia non está asegurada, pero este refacho dános moita confianza para seguir pelexando”, afirma o técnico.
O propio Miguel Ángel Domínguez reflexiona sobre o desafío que enfrontan: “Unha vez alcanzas unha meta alta, o difícil é conservala, e o CD Choco ten un mérito enorme por lograr manter aos seus xogadores e seguir competindo a este nivel”. Con estas palabras, o técnico non só destaca a importancia de non baixar a garda tras os éxitos, senón tamén o valor do club para reter o talento local e consolidar un proxecto sostible na elite.
O próximo reto chegará o 2 de marzo, cando o xuvenil do CD Choco enfróntese ao Real Sporting de Gijón SAD nun partido que podería ser decisivo para afianzar a súa posición na táboa. Co apoio dunha afección entregada e o traballo constante da canteira, o equipo de Redondela ten ante si unha oportunidade de ouro para selar a súa continuidade na elite do fútbol xuvenil español. A remontada xa está en marcha!
