O pleno de Redondela aprobou conceder subvencións nominativas por valor de 317.000 euros a diferentes colectivos do municipio. Asociacións culturais como Xente Titiriteira e a Asociación Cultural e social de Chapela son os colectivos máis beneficiados con axudas por valor de 59.000 e 39.000 euros respectivamente. Tamén reciben importantes achegas os organizadores do Millo verde, os clubs de remo de Chapela e Cesantes ou a Asociación Cultural de Rande con achegas en torno aos 20.000 euros así como colectivos de marcado carácter social entre os que atopamos Lenda, Cáritas e Andaina. Malia o debate a proposta foi aprobada por unanimidade.
A voceira do grupo de goberno, Rita Pérez era a encargada de debullar a relación de beneficiarios destas axudas nominativas que recaen nun total de 18 colectivos de carácter social e cultural. Tamén neste grupo están incluídas outro tipo de entidades como a Asociación de Empresarios que percibirá 15.000 euros ou a Confraría San Xoán de Cesantes cunha subvención de 10.000 euros.
Unha axudas que para o BNG son escasas no referente a determinados colectivos. Así reclamaba o seu voceiro, Xoán Carlos González que se incrementasen as contías destinadas a Lenda ou Andaina para quen defendían un incremento de cinco mil euros. Tamén aludía á necesidade de outorgar unha subvención maior aos colectivos Millo Verde e Xente Tiririteira e duplicar a cantidade que percibe a Confraría de Redondela “nunha situación moi precarizada que se ven arrastrando dende a pandemia” polo que reclamaban que se lles concedera vinte mil euros na vez dos dez mil asignados. Aproveitaba ademais o voceiro do Bloque para recriminar a falta de negociación “unha vez máis” do PSOE e advertía que sen o apoio do voto dos nacionalistas “tedes moi difícil sacar acordos adiante. Estades xogando con lume”.
Contestaba a esas demandas o edil de AER, Roberto Villar, asegurando que na situación actual e cuns orzamentos prorrogados non é viable incrementar estas partidas “uns orzamentos que poderían estar aprobados no caso de que houbese un bo entendemento entre as forzas progresistas” en alusión á nefasta relación existente na actualidade entre o grupo de goberno e o BNG.
Relcamaba tamén o concelleiro que se deran pasos de cara a asumir por parte do concello o labor que realizan entidades como Cáritas.
Dende o PP, Ana Alonso tamén reflexionaba en torno a necesidade de que se concedan estas axudas para que estas entidades poidan seguir desenvolvendo as súas actividades. Con todo, lamentou que as maiores subvencións se concedan as asociacións que se encargan da organización de festivais mentres colectivos que se centran noutro tipo de actividades de carácter social non reciban maiores axudas.
Concluía a concelleira do grupo de goberno, Rita Pérez lembrando que en porcentaxe non son os festivas os máis beneficiados “mentres o Millo Verde recibe un 23% do seu custe ou o Festival de Títeres un 38% do que supón a súa realización, estase a subvencionar nun 42% a actividade da Asociación Cultural e deportiva de Rande que conta ademais con instalacións municipais, do mesmo xeito que outros colectivos como a Asociación Contra o Cancro ou Andaina, entre outras”.
A proposta foi aprobada por unanimidade e supón a concesión das axudas a 18 colectivos.
Relación de colectivos subvencionados
A Asociación contra o Cancro (6.000 euros), Asociación de atención ao enfermo mental Lenda (20.000 euros), Cártas (20.000 euros), Fundación Santa Cruz (3.000 euros), Andaina (20.000), Solidariedade Galega co pobo Saharauí (1780 euros), ONG Damán (2.500) Afaga (18.000), Amigos de Galicia (6.000), Fundación Érguete (10.500), Millo Verde (20.000), Asociación Social de Chapela (39.000 euros) Xente Titiriteira (59.000), Asociación cultural e deportiva de Rande (22.000), Club Deportivo Cesantes (diferentes achegas por valor de 12.000, 9.000 e 2.500 euros pola organización de varios eventos) Club de remo Chapela (9.000 e 12.000 euros pola organización de diferentes eventos, Confraría de pescadores (10.000) e Asociación empresarios (15000).
