Yeray Pillado e Adrián Bouzón nos estudios da Radio Municipal de Redondela
O servizo sae a rúa este sábado para dar a coñecer o traballo que os máis de vinte voluntarios desenvolven nas súas actuacións tanto de emerxencia como de prevención así como o material que empregan nesas intervencións. Animan á veciñanza a achegarse ao antigo mercado do gando en horario de 11:00 a 18:00 horas a unha exposición coa que celebran o Día Internacional de Protección Civil.
O servizo cumpría o pasado ano 30 anos de vida. A día de hoxe son máis de vinte voluntarios e voluntarias os que compatibilizan as súas responsabilidades laborais cunha actividade altruísta á que chegan por “vocación e por ganas de axudar”. Como contraprestación reciben formación en emerxencias, imprescindible para poder realizar esta labor que nalgúns casos está tamén vinculada coa súa profesión.
Para o correcto funcionamento, explican Yeray Pillado e Adrián Bouzón, ambos os dous membros da agrupación en Redondela, é preciso contar cunha organización previa que contemple a existencia de equipos cando se trata de eventos xa programados e contar con reténs dispostos a actuar no caso de seren precisos.
Realizan traballos de busca, actuacións en accidentes de tráfico e sinistros en xeral, organización de eventos multitudinarios como poida ser o Entroido de Verán ou festa do Choco, eventos deportivos, procesións ou mesmo labores de prevención cando se espera unha situación complicada no meteorolóxico.
Con todo, entre as actuacións que lembran como especiais salientan a súa participacións nas axuda aos afectados pola Dina que os levou ata Valencia para trasladar doazóns dos veciños e veciñas de Redondela así como o traballo desenvolvido durante o período da COVID, onde foron un dos servizos que prestou axuda á cidadanía que o precisaba en colaboración con outros servizos de emerxencia.
Para dar a coñecer todo este traballo animan á veciñanza a achegarse este sábado dende as 11:00 horas ata as 18:00 a unha exposición que se vai desenvolver na feira do gando. A mostra servirá para dar a coñecer o material, equipo e ferramentas que os voluntarios de protección civil empregan no seu día a día e inclúe ademais un taller de primeiros auxilios e comunicacións.
Zodiacs, vehículos de emerxencia, material de primeiros auxilios servirán para conmemorar unha data que lembra que o 1 de marzo do ano 1972 se constituíu a Organización Internacional de Protección Civil co obxectivo de desenvolver estruturas nacionais para previr e reducir os desastres na poboación civil.
