O pasado fin de semana, o pavillón central de As Travesas en Vigo acolleu o Campionato Galego 2025 de Grupos Show e Cuartetos, un evento que encheu as bancadas de centos de acompañantes e deleitou ao público coas evolucións dos mellores clubs de patinaxe artística de Galicia. O Club de Patinaxe Artística Arealonga Chapela destacou como un dos grandes protagonistas, logrando excelentes resultados que lle garanten a participación no próximo Campionato de España.
O sábado, na categoría de Grupos Show Pequenos, o CPA Arealonga Chapela proclamouse Subcampión Galego coa súa coreografía “Mercadores de Vidas”, que acadou unha puntuación de 27.42. Este segundo posto, nunha disputada competición con 16 equipos, valeulle ao club unha praza para o Campionato de España, que se celebrará en Reus os días 11, 12 e 13 de abril. O título nesta categoría foi para o Condado de Salvaterra con “Quen me tome o pelo?” (33.80), mentres que o Brión completou o podio con “Memento Mori” (25.40).
Xa o domingo, o Arealonga volveu subir ao podio na categoría de Cuarteto Júnior, conseguindo a terceira posición nunha competición dominada polo Club Patinaxe Gondomar, que se levou o ouro. Este bronce asegura ao cuarteto do Arealonga unha nova oportunidade de brillar a nivel estatal, desta vez en Alcoi, onde se disputará o Campionato de España os días 25 e 26 de abril.
O campionato, organizado polo Club Patinaxe Gondomar, reuniu decenas de patinadoras e patinadores que ofreceron un espectáculo de primeiro nivel, con manobras espectaculares e coreografías coidadas que reflectiron o bo momento da patinaxe artística galega. Na categoría de Grupos Show Grandes, o Ríbex de Tui levou o título con “Da agulla ao desastre” (31.96), seguido do Noia Patín e do Condado, mentres que o Gondomar, aínda que non liderou os paneis principais, celebrou tres vitorias entre Show Júnior e Cuartetos Sénior e Júnior.
O CPA Arealonga Chapela regresa de Vigo con dous podios e a mirada posta nos campionatos estatais, consolidándose como un dos clubs referentes da patinaxe galega. O espectáculo da patinaxe artística, en todo o seu esplendor, deixou imaxes fermosas e un ambiente de festa que promete repetirse en Reus e Alcoi.
