O Chapela CF, un dos clubs máis emblemáticos de Redondela, federado por primeira vez en 1958, continúa consolidándose como un referente deportivo na comarca. José Hermida, presidente da entidade desde hai dous mandatos, comparte a súa visión optimista sobre o presente e o futuro do club, que conta actualmente con 250 fichas e proxectos ambiciosos como a revitalización do Torneo Berete. Máis alá dos éxitos deportivos, Hermida lanza unha mensaxe clara de unidade e defensa do deporte local como soporte esencial da sociedade.
As categorías inferiores son outro dos piares do Chapela CF. Desde prebenjamines ata xuvenís, pasando polos minis, o club prioriza a formación. “A base é o futuro. Cada vez temos máis nenos e nenas que queren xogar connosco, e iso é unha motivación enorme”, destacou Hermida. A tempada pasada, o club celebrou os ascensos dos equipos infantil, cadete e xuvenil, un fito que reforza esta traxectoria ascendente.
O equipo Sénior Masculino, que milita en Terceira Galicia, é unha das apostas de Hermida, aínda que recoñeceu que esta tempada non se alcanzaron todos os obxectivos.”Incorporamos xente nova, con moita ilusión, pero non conseguimos o ascenso. Forma parte do proceso. Estamos a construír algo a longo prazo e confiamos en que os resultados chegarán a tempada seguinte”, explicou con optimismo.
A gran aposta do Chapela CF é o seu equipo sénior feminino de fútbol 7 (F7). “Son un exemplo para a base”, declarou Hermida. Gañaron a primeira fase da liga cun nivel espectacular, e é unha satisfacción ver como o fútbol feminino medra no club. “Estas xogadoras están a inspirar ás nenas da nosa canteira e poden ter un referente para continuar no club e non verse obrigadas a marchar “, sinala o directivo.
O Campo de Fútbol de Chapela, renovado en 2024 cun investimento de máis de 300.000 euros por parte do Concello de Redondela, pasou a ser propiedade municipal grazas á cesión da Comunidade de Montes de Chapela. Esta colaboración asegura ao Chapela C.F. o seu uso gratuíto e mantemento, ofrecendo unhas condicións óptimas para o desenvolvemento dos xogadores e xogadoras. O campo, onde se celebran torneos anuais de gran relevancia que atraen clubs de distintos municipios, reflicte o potencial crecente do club e converte a súa adquisición nun fito significativo tanto para o concello como para a entidade deportiva. José Hermida destacou o papel clave de Rafael Louzán, Presidente da Federación Española de Fútbol, quen aconsellou seguir esta estratexia para mellorar as instalacións, e expresou o seu profundo agradecemento á Comunidade de Montes de Chapela e o Concello de Redondela polo seu traballo e apoio esencial.
Entre os plans do club está a recuperación do Torne Berete, unha competición tradicional que Hermida quere revitalizar. “É unha forma de unir deporte e cultura, implicar á comunidade e dar visibilidade aos nosos equipos. Estamos traballando niso e esperamos ter novidades pronto”, adiantou. Ademais, o club seguirá impulsando eventos como o Torneo Concello de Redondela de Fútbol 8, reforzando o seu compromiso co deporte local.
Hermida fai chamamento á unidade en prol do deporte en Redondela. Sinala que “Hai que deixar de lado as cores políticas e non mesturar a política co deporte. Asegura que Aquí están en xogo os intereses dos nenos e nenas dos nosos equipos”, afirmou con firmeza. O presidente defendeu que os clubs locais, independentemente da disciplina, son “un piar fundamental para a sociedade” e realizan unha labor esencial para a saúde física e mental da cidadanía.
Co céspede recentemente renovado, unha canteira en pleno auxe, o talento dos seus equipos sénior e unha mensaxe clara de cohesión, o Chapela CF encara o 2025 con grandes retos e unha ilusión renovada. A directiva, unida e comprometida – con Joaquín Rodríguez como vicepresidente, Xandra Martínez na secretaría, José Luis Ballesteros como tesoureiro, e os vocais Rosa María Galbán, Óscar Fernández Caride, Javier Conde, Aarón Ledo, Vanesa Campos e Francisco Covelo – busca non só alcanzar éxitos deportivos, senón tamén reforzar o seu papel social na comunidade.
O próximo reto do Chapela CF sénior masculino en Terceira Galicia será este domingo na casa contra o Alerta Sanguiñeda, polo que animan aos afeccionados a achegarse ao Campo de Fútbol de Chapela (Camiño do Gaio, 27, 36320 Chapela, Pontevedra) para coñecer de preto o club e gozar dun día de deporte.
