A asociación Alén Nós de Redondela amosa a súa preocupación e pesar pola situación de abandono e deterioración que leva máis de dez anos afectando o conxunto escultórico localizado na punta da praia de Cesantes, fronte á illa de San Simón. Esta obra, en homenaxe á novela Vinte mil leguas de viaxe submarina de Xulio Verne e realizada polos artistas Ramón Lastra e Sergio Portela en 2004, constitúe un valioso patrimonio cultural e un punto de atracción turística para a nosa comunidade.
A instalación, que comprende unha figura do Capitán Nemo apoiada nun pedestal e dúas figuras de buzos, destaca pola súa capacidade para encher de inspiración tanto aos visitantes como aos habitantes de Redondela. Con todo, a falta de mantemento ao longo dos últimos anos deixou marcas visibles no conxunto, evidenciándose especialmente o estado deteriorado e case destruído dun dos buzos e a excesiva acumulación de moluscos que poñen en risco a integridade estética das esculturas.
Un valor cultural e turístico en risco
Explican dende Alén Nos que este grupo escultórico converteuse nun emblema da praia da Punta de Cesantes, contribuíndo significativamente á identidade cultural e ao potencial turístico da vila. A súa deterioración non só implica unha perda irreparable do noso patrimonio artístico, senón que tamén afecta negativamente á imaxe de Redondela como destino cultural e de verán.
Ante esta situación reclaman a inmediata intervención no conxunto con medidas de limpeza e restauración das esculturas deterioradas e o establecemento dun plan de conservación a longo prazo que garanta a preservación deste legado artístico e cultural.
Tamén solicitan a inclusión e participación do Concello de Redondela na Fundación Museo do Mar de Galicia, xa que o goberno municipal é o máis directo coñecedor das necesidades e intervencións necesarias tanto na illa de San Simón como na súa contorna paisaxística e cultural máis inmediata, como é este conxunto escultórico.
