O Club de Baloncesto de Redondela celebrará o próximo sábado 8 de marzo, Día Internacional da Muller, un torneo solidario cuxa recadación se destinará integramente á ONG redondelá Da Man. O evento terá lugar no Pavillón do IES Mendiño a partir das 19:00 horas e a entrada terá un prezo simbólico de 1 euro.
O torneo, que chega á súa segunda edición, contará cun formato triangular no que o equipo de nais de Redondela se enfrontará a outras formacións similares da contorna: Demamas’ do Morrazo e o CB Condado. As xogadoras locais levan dous meses adestrando para preparar este encontro, que combina deporte e solidariedade.
Este ano, a madriña do evento será Sara Vidal, capitá do Celta Zorka Recalvi, quen sucede a Cristina Cantero, adestradora do mesmo equipo, que apadriñou a edición anterior. “Ter a Cristina foi toda unha honra para o club”, destacan desde a organización. Sara Vidal contribuirá á xornada achegando agasallos para sortear mediante a venda de rifas, entre eles unha camiseta oficial asinada por ela mesma. Ademais, sortearase un vale doado por Mapache, un exemplar do libro “Os deportes de Vigo e a súa área metropolitana” de Eugenio Álvarez, e un almorzo cortesía de Avomakika. O comercio local tamén colaborará con diversas achegas, e a cantina do pavillón estará aberta ao público durante o evento.
Desde o Club de Baloncesto de Redondela agardan “encher o pavillón do IES Mendiño en apoio a unha boa causa” e animan á veciñanza a sumarse a esta iniciativa. “Os partidos son xestos cara á igualdade”, subliñan desde a organización, destacando o carácter simbólico e reivindicativo desta actividade.
