O goberno local continúa subvencionando os taxis que trasladan ao alumnado de bacharelato que carece de praza no autobús escolar dende as parroquias ata os Institutos malia tratarse dunha competencia exclusiva da Xunta. A alcaldesa de Redondela critica tamén que dende o goberno galego se dea a calada por resposta en cuestións como a Fundación Illa de San Simón logo de cinco meses esperando unha reunión co conselleiro de Cultura para tratar a situación da Illa e a recuperación da Fundación como entidade responsable de facer o seguimento do que sucede nese espazo e a renovación do acordo para reabrir a exposición de Sargadelos na Casa da Torre.
A alcaldesa de Redondela, Digna Rivas, solicitou hai cinco meses unha reunión co conselleiro de Cultura, José López Campos, para tratar a situación da illa de San Simón, petición que reiterou o pasado día 12 de febreiro. A día de hoxe aínda non obtivo resposta. Rivas insiste na necesidade de manter un encontro con López Campos, de quen depende a Fundación Museo do Mar de Galicia, entidade encargada da xestión da illa de San Simón e da que Redondela non forma parte. “Para nós é unha discriminación inxusta e inxustificable cara a veciñanza de Redondela. Seguimos reclamando o noso dereito a formar parte desta entidade e ter voz e voto nas súas decisións”, declarou a alcaldesa.
Rivas demanda a recuperación da Fundación Illa de San Simón, unha entidade “que debe facer seguimento do que sucede na illa, das súas necesidades cara ao futuro, do programa de actividades, dunha correcta sinalización e contextualización máis aló da exposición recollida na illa de Santo Antón”.
Tamén lembra outros temas pendentes da Xunta como a renovación do acordo para reabrir a exposición de Sargadelos na Casa da Torre polo que levan meses agardando ou o tema do transporte escolar “que depende exclusivamente da Xunta de Galicia polo que estamos á espera dunha solución por parte do goberno galego para o alumnado de bacharelato que vive nas parroquias, xa que de momento é o Concello o que fai posible os traslados cun servizo de taxis”. Unha problemática que afecta a un total de 30 alumnos e alumnas de diferentes parroquias do municipio que carecen de alternativas para trasladarse dende os seus domicilios aos institutos no centro da vila.
