O Centro Cultural de Cabeiro non se resiste a celebrar o Entroido e convoca á veciñanza a un festival do Carnaval que ten como protagonista especial as figuras tradicionais das Madamas e Galáns que sairán pola vila ás 17:00 horas -no caso de que non chova- acompañadas polo grupo de gaitas Sadeo. En caso contrario a celebración terá lugar na sede do Centro cun festival de disfraces co grupo de animación Carcaxadas. A entrada é de balde.
Unha tradición que se remonta a décadas atrás e que durante anos estivo esquecida ata que no 2010 se recuperou. Dende esa data vense realizando de xeito continuado. O obxectivo do Centro Cultural é manter a tradición e incluso alentar á veciñanza a que participe activamente, xa que a día de hoxe ante a falta de danzantes que se animen a formar parellas vense obrigados a traer un grupo de fora que é o encargado de realizar o baile, explica o presidente do centro David Jorge.
A orixe deste baila das Madamas e os Galáns habería que buscala na rivalidade existente entre dúas tabernas da parroquia que no Entroido competían por ter as mellores actuacións e os mellores danzantes. Dende hai anos a directiva do centro traballa en recuperar esta tradición, motivo polo que organiza este sábado un festival que inclúe un desfile a partir das 17:00 horas polo centro da parroquia.
Un desfile moi vistoso, xa que as mulleres van vestidas de branco e adornadas con capullos de camelias e mimosas e lucindo grandes colares e pendentes de ouro, acompañadas dos seus Galáns, vestidos con pantalón e camisa branca, gorro de copa e un entorchado, fan un percorrido pola parroquia.
O desfile suspenderase no caso de que chova, pero o baile realizarase igualmente na sede do centro cultural. A continuación celebrarán un baile de disfraces e sortearanse diferentes premios.
