O investimento permitirá acometer obras na pista multideporte de Calvos cun novo peche perimetral e nas piscinas municipais de Fornelos de Montes onde se instalará unha pérgola para garantir unha zona de sombra. O investimento de máis de 85.000 euros procede do II Plan Extraordinario de Infraestruturas Deportivas
O deputado provincial Jorge Cubela visitou xunto co alcalde de Fornelos de Montes, Emiliano Lage, as instalacións da pista multideporte de Calvos e das piscinas municipais da vila, onde anunciou que a Deputación aprobará na Xunta de Goberno deste venres unha inxección económica de máis de 85.000 euros para a mellora destas instalacións deportivas a través do II Plan Extraordinario de Infraestruturas Deportivas. Ao abeiro deste plan, Fornelos de Montes recibirá este ano o triplo dos recursos que o pasado, investimento que permitirá financiar a mellora das instalacións deportivas de Calvos e das piscinas municipais de Fornelos. Concretamente en Calvos mellorarase a seguridade da pista deportiva eliminando os peches de maia electrosoldada en mal estado e instalando un novo peche perimetral con dúas portas de acceso á pista e aos vestiarios. No caso das piscinas municipais xerarase unha zona de sombra na área de espera que consistirá nunha pérgola que continuará a cuberta existente do bar.
