A plantación da árbore tivo lugar o sábado dentro das actividades organizadas en Redondela co gallo da celebración no noso concello da IV Asemblea da rede galega por Palestina que reuniu a organizacións e colectivos galegos solidarios co pobo palestino. Os participantes marcharon polas rúas da vila esixindo o fin de todo tipo de relacións, políticas, económicas, culturais ou diplomáticas con Israel e plantaron unha oliveira nos xardíns da Xunqueira.
Os actos arrancaron a primeira hora da mañá do sábado cun encontro para debater sobre os procedementos e as accións para intensificar a resposta social de rexeitamento ao xenocidio palestino.
As 18:00, unha vez rematada a asemblea, unha marcha percorreu as rúas de Redondela nunha cita que para os organizadores foi “unha mostra máis da solidariedade do pobo de Redondela coa causa palestina que leva dende o 6 de novembro de 2023 concentrándose todos os luns ininterrompidamente, manifestando o seu rexeitamento ao xenocidio, esixindo o fin de relacións co estado de Israel, a súa solidariedade coa resistencia palestina e o seu estupor ante a inacción da comunidade internacional”.
Ao final da marcha plantouse unha oliveira nos céntricos xardíns do paseo da Xunqueira para enxalzar o Día da Terra Palestina e a “humanidade de ese pobo que resiste ao epítome da crueldade” subliñaron dende A Rede.
Finalmente chamaron á sociedade galega a participar “en todos os actos de solidariedade coa Palestina” e lembraron que este luns, 31 de marzo, no Auditorio de Galicia en Compostela, a partir das 20:00h, con entrada gratuíta e organizado polo Comité de Solidariedade Galego coa Causa Árabe, se celebrará unha Concentración da Cultura Galega contra o Xenocidio coa participación dunha nutrida representación de artistas de todos os ámbitos da cultura galega.
