Operarios do Concello de Redondela veñen de renovar o camiño da Chousa en Vilar, con máis de 100 metros de camiño asfaltado en quente para o que se empregaron 65 toneladas de alcatrán. O concelleiro Reberto Villar destaca que é a primeira vez que se acomete unha obra desta envergadura con medios municipais. Por outra banda, a empresa adxudicataria do contrato de limpeza de camiños, Naturgalia, comezará mañá, 1 de abril, os traballos de roza en Cesantes. As brigadas traballarán ata finais de xuño para deixar a punto o resto dos camiños municipais de todas as parroquias.
A mellora do camiño da Chousa en Vilar é unha das actuación que destaca a concellería de Infraestruturas e Sostibilidade. O seu titular Roberto Villar afirma que se “está a avanzar na reparación e mellora das estradas e camiños do municipio, e o obxectivo é seguir nesta liña tanto con fondos propios do Concello como doutras administracións”. Apunta que están a piques de rematar as obras de acondicionamento e mellora do pavimento en oito camiños municipais en Cesantes, Quintela, O Viso, Reboreda, Redondela, Vilar e Cedeira. Unha das estradas que se renovou é o camiño Coto do Coello en Cedeira, que dá acceso ao colexio Vigo. Con todo, o asfaltado de máis superficie foi o do camiño de Baixada da rúa Campo de Fútbol á rúa Pedro Floriani, en Cesantes, con máis de 1.125 metros cadrados.
Traballos de roza
A empresa adxudicataria do contrato de roza e limpeza, Naturgalia, comeza este 1 de abril os traballos de roza e limpeza en Cesantes. As brigadas traballarán ata finais de xuño para deixar a punto o resto dos camiños municipais de todas as parroquias. As tarefas de roza e limpeza faranse dúas veces ao ano en todos os camiños públicos de Redondela, cunha primeira fase no trimestre de abril a xuño e unha segunda roza entre setembro e novembro. Os traballos permitirán tamén cumprir coa normativa de prevención e defensa contra os incendios forestais.
“O obxectivo deste contrato histórico que comezou o ano pasado é que todos os camiños das parroquias e as súas marxes estean en perfectas condicións todo o ano”, explica a alcaldesa Diga Rivas.
Os traballos deixarán os camiños e as súas marxes despexados, rozados e limpos, o que inclúe a maleza, herbas e arbustos tanto nos camiños como nas beiravías e noiros. Os operarios retiran todo o lixo e restos vexetais e fan unha a limpeza a fondo das cunetas con maquinaria especializada. As brigadas limpan os caños e sistemas de drenaxe obstruídos por vexetación ou outros residuos e retiran todo o lixo acumulado permitir unha boa evacuación da auga.
Desperdicios como bolsas plásticas, papeis, latas ou botellas que se atopen durante os labores de limpeza tamén son retirados e Naturgalia encárgase do transporte de todo os residuos, así como da súa clasificación, xestión e tratamento segundo a normativa medioambiental.
O contrato, por dous anos, licitouse por un importe de 989.268 euros e podería prorrogarse dous anos máis, de xeito anual.
