Foto montaxe do club de Arcade
O pavillón Alonso Rodríguez de Noia acolleu este domingo a fase autonómica do Campionato de España da Federación Española de Kickboxing e Muaythai (FEKM), unha cita clave para a clasificación no torneo nacional. A organización do evento correu a cargo da delegación galega da federación, coa colaboración dos clubs locais ITF Noia e Club de Loita Noia. O evento reuniu a competidores de todas as idades, desde os 8 ata os 50 anos, nun total de sete probas —catro de tatami e tres de ring—, nun ambiente vibrante e cun nivel deportivo excepcional grazas á presenza de algúns dos loitadores galegos máis laureados, con títulos nacionais e internacionais.
Entre os participantes destacou o Club de Kickboxing de Arcade, que, a pesar de acudir cun número reducido de competidores e de enfrontarse a dificultades como lesións que obrigaron a renunciar a varias finais, logrou un impresionante medalleiro: 24 ouros, 12 platas e 9 bronces. O presidente do club, Manuel Álvarez, mostrou a súa satisfacción polo rendemento dos seus deportistas: “Este ano acudimos con menos participantes por varias circunstancias e, ademais, renunciamos a varias finais por lesións nos combates previos, pero estamos moi satisfeitos polo traballo dos competidores e competidoras, dado o altísimo nivel que había, algo que non se vía nunha fase galega desde hai anos”.
Álvarez tamén destacou que “case todos os competidores só participaron en dúas probas, o que restou posibilidades no medalleiro”, e agradeceu tanto á organización pola acollida como ás dúas nais colaboradoras do club, “que, sendo primerizas, demostraron unha gran profesionalidade na preparación e organización dos nosos deportistas”.
O presidente concluíu cunha mensaxe de ánimo: “Parabéns aos nosos competidores e competidoras polo traballo realizado. A seguir co camiño, que o camiño se fai andando paso a paso”. Estes resultados clasifican aos gañadores para o Campionato de España da FEKM, onde o Club de Kickboxing de Arcade buscará revalidar e superar o éxito acadado o ano pasado.
RESULTADOS DA FASE GALEGA:
- CAEL ANDREW: Ouro POINT, Ouro LIGHT, Ouro KICK
- ISMAEL VILLANUEVA: Ouro POINT, Prata KICK, Bronce LIGHT
- DYLAN: Ouro POINT, Prata LIGHT
- EDUARDO NARCISO: Ouro POINT
- LUCA BOUZON: Ouro LIGHT
- EDUARDO VIDAL: Prata POINT, Prata KICK, Prata LIGHT
- MIA SOFIA: Ouro LIGHT
- ADRIAN SABAJANES: Ouro KICK, Ouro FULL
- MARIÑA DIAZ: Prata POINT, Bronce LIGHT
- ANDREA SEOANE: Ouro LIGHT, Bronce POINT
- ANXO MARTINEZ: Ouro LIGHT, Prata POINT
- MARTIN FIGUEIROA: Bronce POINT
- MARTA ROMERO: Ouro POINT, Ouro LIGHT
- UXIA VIDAL: Prata LIGHT, Bronce POINT
- MARIA BOUZON: Ouro LIGHT, Prata POINT
- PABLO VEIGA: Ouro POINT
- ALVARO PARDO: Ouro LIGHT, Prata POINT
- OSCAR SOTO: Prata LIGHT, Prata FULL
- ALEX CABALEIRO: Ouro POINT, Ouro LIGHT
- IZAN BOUZON: Bronce LIGHT, Bronce POINT
- RUBEN DE LA TORRE: Prata POINT, Bronce LIGHT
- DANIEL AMOEDO: Ouro POINT, Ouro LIGHT
- LIDIA LEIRO: Ouro LIGHT
- MENCÍA DIAZ: Ouro LIGHT
UN 2024 DE RÉCORD NO NACIONAL
No Campionato Nacional de Clubs celebrado en Torremolinos (Málaga) do 29 de novembro ao 1 de decembro de 2024, o Club de Kickboxing de Arcade deixou unha marca histórica. Cun total de 17 deportistas representando ao club entre os máis de 800 competidores de 69 clubs de toda España, o equipo acadou 9 ouros, 8 pratas e 12 bronces, o que lle valeu o segundo posto na clasificación xeral, só por detrás dunha selección das Illas Baleares composta por varios clubs. Este éxito consolidou ao club como o mellor de Galicia, aportando o maior número de medallas á Selección Galega, e elevou o seu total de ouros na tempada a 86, sumando os logros en campionatos galegos, nacionais e internacionais de xaneiro a xullo.
Entre os medallistas destacaron nomes como Gael Vidal Rodríguez (ouro en Point Fight e Light Contact na categoría júnior), Anxo Vidal Rodríguez (ouro en Kick Light senior) ou Mencía Díaz Taboada (ouro en Point Fight cadete maior), entre outros, demostrando a calidade e a versatilidade dos deportistas do club. Este ano, coa motivación dos 24 ouros logrados en Noia, o equipo de Arcade prepárase para superar estes resultados no Nacional, co obxectivo de alcanzar o primeiro posto.
