O Obradoiro e Estudos Locais Fernando Monroy de Cesantes organiza este sábado 5 ás 19:00 horas a proxección do documental “Los caminos de Colón” da Asociación Colón galego. A continuación o seu presidente Eduardo Esteban Meruéndano participará nun debate moderado e presentado por Manuel Puga Pereira, escritor redondelán presidente da Fundación Penzol.
A orixe de Cristobal Colón está rodeada de misterio e de incógnitas. De feito, ao longo da historia se lle chegaron a atribuír un total de 25 identidades sen que, ata ode agora, se poida certificar cal é a definitiva. Son diferentes os países e comunidades que reivindican a nacionalidade do navegante. Unha das conclusión que se desprenden do documental “Colón ADN. Su verdadero origen” é que Colón procedería do mediterráneo, máis concretamente de Valencia desbotando a teoría que defende que o navegante era galego. A raíz da emisión deste documento na televisión xurde no obradoiro o interese por afondar máis nesta cuestión, tal e como nos explicaba o seu presidente José Antonio Martínez.
A asociación Colón galego entende que esas conclusións poderían estar erradas e mantén a súa teoría de que a súa procedencia era galega. Aséntase para esa afirmación en dous piares fundamentais. Por unha banda apuntan a que o navegante podería ser Pedro Álvarez de Soutomayor (Pedro Madruga) e, por outra banda, no feito de que a Caravela La Pinta ao seu regreso de América puxo rumbo a Baiona. A maiores tamén destacan a presenza de topónimos e numerosos apelidos presentes en Galicia, principalmente na contorna do concello de Poio, municipio que acolle a casa museo de Colón, onde se ofrece un percorrido polas diferentes hipóteses que apoian a orixe galego de Colón, dende os primeiros traballo de finais do século XIX ata os estudos máis recentes.
De todo isto falarase na charla do sábado no Multiúsos aberta a todo o público que queira achegarse.
