A parcela de 4000 metros cadrados na contorna da Levada de Casqueiros comeza a tomar forma coa plantación dos diferentes árbores que converterán esta leira infrautilizada nun espazo de biodiversidade e producións sostible de alimentos. No Concello traballan tamén na erradicación do eucalipto, coa retiradas destas árbores na zona de Pousiño e a súa substitución por castiñeiros autóctonos.
O Concello de Pazos traballa co obxecto de lograr ter un monte máis sostible, ecolóxico e produtivo. Nese camiño teñen en marcha dous proxectos: por unha banda a substitución dos eucaliptos por castiñeiros e por outra a creación dun bosque comestible.
A primeira das actuacións está a levarse a cabo en Pousiño, lugar no que se procedeu a eliminar os eucaliptos e se procedeu a plantar castiñeiros autóctonos. O obxectivo, segundo explica o alcalde Luciano Otero é “revitalizar a paisaxe e crear unha barreira natural contra os incendios forestais, xa que os castiñeiros son menos propensos ao lume que outras especies pirófitas como os eucaliptos”.
O outro gran proxecto no que están a traballar é no bosque comestible de os Cubelos, unha iniciativa que busca transformar unha parcela de 4000 metros cadrados na contorna da Levada de Casqueiros nun bosque comestible. O proxecto, promovido polo Concello e financiado por Galicia Suroeste conta cun orzamento de 45.000 euros e permitirá recuperar un terreo infrautilizado que a medio prazo suporá un atractivo para veciños e visitantes.
O proxecto consiste en dotar a parcela de 0’4 hectáreas con diferentes árbores froiteiras e plantas aromáticas e mediciñas como moreiras, castiñeiros, sabugueiros, pereiras bravas ou maceiras serán algunhas das árbores que se sementarán na zona nas vindeiras semanas empregando o método Miyawaki, unha técnica importada do Xapón que busca crear bosques autosuficientes nun tempo máis curto que os métodos tradicionais de reforestación. Ademais todas as especies estarán micorrizadas para favorecer o cultivo de cogomelos.
