Os traballadores municipais iniciaron a pasada semana a posta a punto de toda a contorna marítima de Arcade (Peirao, praias Muxeira e Matilde e paseo marítimo) de cara á Festa da Ostra, que terá lugar os dáis 4, 5 e 6 de abril, e ante o comezo do bo tempo, cando centos de persoa se achegan cada día a esta zona do concello.
A primeira actuación consistiu na limpeza manual da praia da Muxeira. Neste sentido, apuntan dende o goberno local que na medida do posible, as limpezas e adecentamentos levaranse a cabo de maneira manual, co obxectivo de respectar a contorna natural e evitar o impacto negativo de usar maquinaria de maneira continuada.
Despois de incorporar a semana pasada a primeira quenda de 10 operarios municipais, o Goberno de Soutomaior xa está a levar a cabo a planificación para adecentar o centro urbano de Arcade e todos os barrios do concello nas vindeiras semanas.
Ademais de adecentar os areais e zonas de esparcimento máis empregadas coa chegada do bo tempo, tamén se traballará a todos e cada un dos barrios do concello. Ademais, de cara a maio está previsto reforzar o servizo de limpeza e mantemento de vías coa contratación doutras 9 persoas. Así, nos meses de verán e de máis afluencia de persoas no concello, Soutomaior terá un operativo especial que contará con máis de 20 persoas na rúa para que tanto a veciñanza como as persoas que visiten o concello miren Soutomaior no mellor dos estados.
