Os catros concellos que conforman a comarca de Redondela lograron ao longo do pasado mes de febreiro diminuír o número de persoas inscritas nas listas do paro. Así o recollen os datos da Consellería de emprego nos que se certifica un tirón no mercado laboral á espera de que as cifras melloren coa chegada da Semana Santa e o bo tempo, que tradicionalmente se traducen nun incremento de traballadores, principalmente na hostalaría.
Redondela encadea cinco meses de descensos consecutivos no número de desempregados e pecha o mes de febreiro con 1422 persoas buscando un emprego, 44 menos que no mes anterior. Caída tamén no concello de Soutomaior no que foron 29 as persoas que asinaron un novo contrato de traballo, sendo 442 as que continúan inscritas nas listas do paro. En Pazos de Borbén a cifra de parados ascende a 157, nove menos que no mes de xaneiro, mentres que en Fornelos de Montes bátese todo un récord ao descender dos cen desempregados: son actualmente 96 as persoas que se atopan sen traballo, nove menos que no mes anterior.
