O libro está enmarcado dentro da colección editada polo Concello de Redondela –todos eles con portada de Ángel Barros- sobre as parroquias do municipio. Presentarase este xoves 10 ás 19:00 horas na Biblioteca Xela Arias no Multiúsos do Piñeiral nun acto aberto no que José Luis Grande falará sobre o proceso de elaboración do texto e entregarase un exemplar a cada un dos asistentes.
José Luís Grande ofrécenos a través deste libro un completo percorrido polo ámbito cultural, económico, deportivo, xeográfico e etnográfico de Chapela, co obxecto de achegarlle a toda a veciñanza unha imaxe global dunha parroquia que presenta particularidades distintivas respecto do resto do territorio: a súa proximidade con Vigo, unha importante industria vinculada co mar con Pescanova a cabeza ou unha elevada poboación de preto de 8.000 habitantes que marcan ese núcelo urbano onde non falta un centro de saúde propio, un instituto ou o Multiúsos, servizos que chegaron logo da loita e a reivindicación vecinal.
Un documento co que quere tamén “facer parroquia” recollendo todo o movemento vecinal, moi activo en Chapela, e que se remonta a principio do século XX coa sociedade agraria “La progresiva”, a Unión Marinera de tendencia socialistas, Sociedad Marinera e xa a Asociación de veciños que nace en torno aos anos 70 ante as obras de construcción da autoestrada AP-9 que vai partir a parroquia en dúas.
Entre as curiosidades que poderemos atopar no texto salienta Grande a existencia de Xoán Soárez de Chapela que segundo as últimas investigacións sería un trovador natural da parroquia.
Unha rica crónica cultural marcada polos diferentes gurpos e asociación que traballan na parroquia dende medianos dos anos 50 do ano pasado: o Círculo Cultural, o grupo Anaquiños, a escola de música ou a coral O Piñeiral, entre outros.
Non falta tampouco a reivindicación á hora de falar da contorna natural “a parroquia chegou a ter 24 muíños, hoxe practicamente desaparecidos” grazas a esa vinculación da parroquias cos ríos e regatos que nacen no monte e atravesan Chapela.
E como non podía ser doutro xeito hai un apartado tamén as festas “cunha intensa programación de celebracións onde non faltan as citas gastronómicas que teñen medrado nos últimos anos”.
