O alumnado de 15 centros de ensino de Infantil, Primaria e Secundaria así como usuarios e usuarias de 5 Centros de Día de maiores dánse cita este mércores na Alameda de Castelao para celebrar o Día Internacional do Libro nunha xornada amenizada pola música do grupo de Pandeiretas Anaquiños de Chapela e o espectáculo de Barafunda Animación. Ademais, o alumnado dos institutos participará nun obradoiro de ilustración co debuxante Víctor Rivas.
Este mércores 23 de abril, Día Internacional do Libro, a Alameda Castelao acollerá a V edición de “Lectura na rúa”. Unha iniciativa que xurdiu desde o CEP Plurilingüe Santa Mariña e que conta agora coa participación de todos os centros de ensino. “Lectura na rúa” converteuse tamén nunha xornada de convivencia interxeracional ao que asisten usuarios e usuarias de cinco Centros de Día de maiores de Redondela. O obxectivo deste evento é fomentar a lectura.
Co apoio e financiamento do Concello de Redondela e a colaboración das Bibliotecas Municipais e a ANPA Ernestina Otero, o evento converteuse nunha gran festa da lectura e a cultura compartidas na que participan ao redor dun milleiro de rapaces, rapazas e maiores. Asistirán 15 centros educativos de Infantil, Primaria e IES de Redondela, ademais de 5 Centros de Día do municipio que se xuntarán na Alameda Castelao para celebrar esta xornada. O evento, que se estenderá dende as 10:30 ata as 13:00 horas, contará con desfile de contos, cancións, bailes, lectura compartida e intercambio de marcadores de libros. Non faltará a música co grupo de Pandeiretas Anaquiños de Chapela e o espectáculo de Barafunda Animación. Ademais, o alumnado dos institutos participará nun obradoiro de ilustración con Víctor Rivas, artista de banda deseñada e ilustrador de obras tan coñecidas como Esmeraldina ou Escarlatina, de Ledicia Costas.
O concelleiro de Ensino, Iván Valles, confía en que a iniciativa sexa “un éxito” como en edicións anteriores, e agradece ao CEP Santa Mariña e o resto de centros a súa implicación. A alcaldesa, Digna Rivas, afirma que desde o Concello “estaremos sempre apoiando iniciativas como esta, na que a cidadanía, tanto a infancia como os maiores, é a protagonista”.
