A asociación de Pais do Centro de Atención da Minusválidos Psíquicos de Chapela rexeita o pago dos medicamentos e outros tipo de produtos que necesitan os internos ante a entrada en vigor do copago sanitario e a retirada dalgúns deses produtos do catálogo de medicamentos financiados polo sistema nacional de saúde.
O secretario da APA, Raimundo Iglesias lembra ademais que a medida non se pode aplicar neste caso dado que a lei recolle a “exención do copago para as persoas con discapacidade” que é o caso dos residentes nestas instalacións, 120 persoas con minusvalías superiores aos 65%.
A directiva da Asociación apunta que este copago suporá un gasto extra de entre 70 e 80 euros mensuais, unha cantidade elevada se temos en conta que se trata de persoas que na súa maior parte reciben pensións que oscilan entre os 500 e os 600 euros. Unha situación que podería agravarse de aprobarse o novo regulamento interno do centro no que se recollen que serán os familiares os que paguen as reparacións das cadeiras de rodas e os cueiros.
