Silva e Comis foron os autores dos goles que permitiron a remontada do Coco ante o Pontevedra. E rompen coa racha de Pasarón, onde os granates non perderan ningún partido esta temporada. Tres puntos que permiten ao Choco facerse coa cuarta praza que permite xogar o “play off”.
Terceira División
Pontevedra 1-2 Choco
O equipo de Redondela logrou onte a vitoria no campo de Pasarón ante o líder da categoría, o Pontevedra, e tras superar o gol inicial de Pablo Carnero. Jacobo Montes e os seus pupilos propuxeron un enfrontamento sen medo ante o que é o mellor equipo da categoría, e con moitos xogadores no centro do campo, fixéronse coa posesión e o dominio do esférico. Non obstante, o primeiro en marcar sería o equipo local tras unha carambola. Cortegoso quixo xogar en longo tras un saque de esquina en contra, pero o esférico rebotou en Fernando e caeu ós pés de Carnero, que só tivo que empurrar o balón. Silva aproveitou unha pena máxima para facer a igualada e xa no segundo tempo unha xogada do dianteiro rematou co disparo cruzado de Comis, que marchou ata o fondo da portería de Edu. Nos últimos minutos aguantou o resultado o equipo de Redondela para subir á cuarta posición, zona de promoción de ascenso, grazas ao tropezo do Rápido de Bouzas. Os de Montes terán que defender esa cuarta praza a próxima fin de semana en Santa Mariña diante do Bergantiños, que é 8º, a tan só dous puntos dos redondeláns.
Pontevedra: Edu, Adrián, Lobato, Pablo, Capi, Kevin Presa, Tubo (Jacobo, min. 68), Múñiz (Pedro García, min. 58), Pablo Carnero, Mouriño, Jorge Rodríguez (Anxo, min. 53).
Choco: Cortegoso, Iago Vázquez, Saúl, Lucas, Carminatti, Fernando, Comis (Pablo Piñeiro, min. 79), Xosé Ramón, Félix (Rober, min. 87), Hugo, Silva (Aitor Gómez, min. 71).
Goles: 1-0, min. 29: Pablo Carnero; 1-1, min. 32: Silva, de penalti; 1-2, min. 61: Comis.
Árbitro: Manuel Casanova Cudeiro. Amosou cartón amarelo a Kevin Presa e Jacobo polo Pontevedra e a Iago Vázquez polo Choco.
Segunda Autonómica
Choco B 2-0 Gondomar
O filial do Choco mantense na segunda praza do grupo, a tan só dous puntos do líder, o Nigrán, logo de superar ao Gondomar, afundido na metade baixa da clasificación. Un gol en cada parte foi suficiente para que os redondeláns aumentaran a súa vantaxe con San Miguel e Lavadores. Precisamente o San Miguel será o próximo rival dos redondeláns.
Atlético Cuntis 1-2 Arcade
Os de Soutomaior reciben un balón de osíxeno ao sumar tres puntos no campo do Cuntis, que perde as posicións de cabeza no grupo. A próxima xornada o Arcade recibe ao Catoira, penúltimo clasificado.
Terceira Autonómica
Chapela 1-1 Peña Beretes
Reparto de puntos no derbi local entre os dous equipos da parroquia. Rafa foi o protagonista do encontro, poñendo a cara e a cruz para o seu equipo. O xogador foi o autor do gol do Chapela, pero logo foi expulsado e complicou as cousas para os anfitrións, que non puideron consolidar a vitoria no derbi. Circunstancia que aproveitou o Peña Beretes para anotar o gol do empate. Na próxima xornada o Chapela, na segunda praza, xogará no campo do San Roque, penúltimo do grupo. O Peña Beretes, desde a parte baixa da táboa, recibirá ao Balaídos, que é quinto.
Vilar – Nespereira ( suspendido)
Na vindeira xornada o Vilar xogará no campo do Covelo, penúltimo clasificado.
Sampaio 3-0 Cesantes
O Cesantes está cada vez máis afundido no pozo da clasificación logo da derrota no campo do Sampaio. A próxima fin de semana terá ocasión de mellorar os seus resultados, xa que recibe ao Marín, situado un posto por baixo dos redondeláns.
