A música que une as dúas beiras do Atlántico será a protagonista do espectacular concerto que se celebra na noite de mañá sábado na praza da Casa da Torre. Participan cinco agrupacións corais chegadas do Morrazo, Maceda, Manresa e Redondela.
O sexto certame de Habaneras, que organiza a concellería de Cultura de Redondela, achega á Casa da Torre os nostálxicos sons desta música. O festival conta coa participación de cinco agrupacións corais: a coral polifónica Albricias, de Maceda, a coral polifónica de Beluso, a coral polifónica de San Esteban de Negros, o coro xuvenil do conservatorio de Manresa e a coral polifónica Ondas do Mar de Vigo, de Cesantes. O concerto destas agrupacións estará acompañado dun espectáculo de luz e imaxes. A cita é ás 22:00 horas con entrada de balde.
