Os xardíns do Castelo de Soutomaior serán escenario este xoves, ás 19.00 horas, da Gala do Deporte provincial, organizada pola Deputación de Pontevedra, na que se entregarán as bolsas DepoDan e DepoPromesa a 181 deportistas que teñen a marca provincial. A Gala arrancará cunha homenaxe a Fran Teixera, histórico adestrador de balonmán e técnico do BM Chapela durante 14 campañas ininterrompidas, falecido recentemente, e contará coa actuación musical de Carlota Crey.
No evento, que será conducido polo xornalista Terio Carrera e a capitana do Atlético Guardés de balonmán feminino, Lorena Pérez, farase un recoñecemento especial ás olímpicas, olímpicos, paralímpicas e paralímpicos que deixaron tan alto o nome da provincia nos Xogos de Tokio, así como a todas as e os deportistas de alto nivel e “promesas” que tantos éxitos acadan ano tras ano convertendo á provincia en todo un referente no mundo do deporte.
A presidenta da Deputación amosou o seu orgullo “polo nivelazo do noso deporte e lembrou que é o terceiro ano que a Deputación de concede as bolsas DepoDan e DepoPromesa “que permite ás e aos deportistas adestrar e preparar os seus obxectivos e tamén que poidan participar en competicións nacionais e internacionais”. Do total das bolsas concedidas 137 serán para deportistas de alto nivel, que recibirán 174.300 euros, e as 44 restantes para deportistas promesa, que contarán con 24.700 euros.
