Logo de doce xornadas de liga na Primeira Nacional, o Rodosa Chapela é o pechacancelas do grupo. Pouco ten que ver o actual equipo co das campañas pasadas, con cambios no corpo técnico e tamén no equipo. O adestrador, Miguel Sánchez, lembra que dos 16 xogadores que compoñían o grupo a pasada temporada “non había ningún cando comezou a liga”. O conxunto foise configurando con rapaces da canteira, xogadores moi novos “con moita ilusión pero pouca experiencia”. Logo foron incorporándose algúns efectivos máis, cos que o equipo gañou veteranía “e notouse o cambio”, sinala Sánchez.
O adestrador agarda que xornada tras xornada o equipo poida ir gañando “a tranquilidade e a confianza necesaria” para que os xogadores mais novos poidan dar o mellor de si. A pasada fin de semana o Rodosa Chapela sumou o primeiro punto da temporada. Logo de quedar ás portas a pasada xornada ante o Galdar Gran Canaria, os de Chapela sumaron un empate en Coia con sabor “agridoce” logo de ir por diante no marcador ata os últimos minutos.
Esta fin de semana reciben en Chapela ao Carballal. Outro derbi comarcal que afrontan “con moita ilusión” e con necesidade de sumar “xa que cada vez queda menos para rematar a primeira volta”. O técnico pídelle aos xogadores “dar un pouco máis ”, e sinala que é necesario “estar ao cen por cen como colectivo”.
A piques de rematar a primeira volta, e o obxectivo da permanencia pasa por sumar cando menos cinco puntos, polo que lle farían falta dúas vitorias nas tres xornadas que quedan.
