O Concello de Redondela vén de reunirse coa Plataforma en Defensa da Enseada de San Simón, a Asociación de Veciños de Chapela e representantes da Confraría de Pescadores de San Xoan de Redondela e Virxe do Carme de Arcade. Unha xuntanza celebrada o luns na que acordaron demandar a “paralización inmediata da actividade de estacionamento de coches no Peirao da Pedra, así como a súa retirada sen riscos para a circulación e os peóns”.
Denuncian que a Autoridade Portuaria está a poñer en marcha actividades que na práctica supoñen converter a Enseada de San Simón nunha dársena máis de porto de Vigo para o almacenaxe e reparación de contedores, reparación e limpeza de grandes buques de transporte de automóbiles, depósito de aparcadoiros, refuxio para buques en situación de risco de verteduras ou o establecemento nese lugar, e sen concesión, da estivadora Terminales Atlánticas Vigo.
Ante este comportamento de “feitos consumados”, o goberno local súmase ás demandas do resto de colectivos e considera “necesario evitar a ocupación innecesaria de solo así como os efectos negativos sobre a Rede Natura 2000 e concretamente a enseada de San Simón”. Reclaman tamén que se favoreza a actividade vinculada aos recursos produtivos de pesca tradicional, marisqueo o cría de moluscos e os valores e potencialidades ambientais “como garantía para manter a compatibilidade coa biodiversidade e os hábitats de interese europeo”.
