Foto: Patry Rivas
Ferrolterra foi a equipa gañadora do I Torneo de Veteranas das Sarillas celebrado o pasado sábado no Pavillón da Bomboneira. O evento, de carácter solidario, foi un éxito de participación con 6 equipas de Galicia, Asturias, Valladolid, Sevilla e Portugal.
Ao longo da xornada, que comezou ás 9:00h da mañá e rematou ás 21:00h da noite, foi enchéndose o pavillón de familiares das 100 xogadoras participantes e de afeccionados do balonmán que se achegaron a ver xogar ás veteranas e participar na causa solidaria. Conseguíronse recadar 1.228 euros a través da venda de rifas que se destinará integramente á Asociación Galega de Afectados pola Esclerose Lateral Amiotrófica.
As Sarillas fan un balance moi positivo da experiencia que estivo chea de sorpresas. Durante os descansos dos partidos fíxose o sorteo das rifas repartindo case 50 agasallos doados polo comercio local. Os gañadores e gañadoras recibiron dende cestas de froita a material deportivo, cupóns para peiteados ou accesorios de xoiería.
Ademais da rifa tamén houbo momento para poñer en valor a tradición e ensinar parte da nosa cultura ás equipas de fóra de Galicia. O grupo de baile e gaitas Airiños de San Simón amenizou o evento percorrendo a pista da Bomboneira e ofrecendo música no exterior do pavillón durante o intermedio. A Coca Simona estivo presente como mascota oficial do torneo e tanto as xogadoras como o público pedíronlle fotografías para enmarcar o recordo.
Dende a organización do evento dan as gracias ao comercio local, ao corpo técnico e a directiva da SAR Rodavigo, á Federación e o Concello de Redondela por facer posible o torneo e “axudar dende o primeiro momento”. Tralo éxito de participación esperan poder volver a celebralo o ano que vén.
CLASIFICACIÓN
1. Ferrolterra
2. Siero
3. Valladolid
4. Sevilla
5. Sarillas
6. Baltar
