O goberno local, tras condenar os actos vandálicos acontecidos durante a madrugada deste luns no Paseo de Cardona en Chapela contra a exposición ‘Conquistadoras’, adiantou que os paneis “serán repostos o máis rápido posible e tomaranse as medidas necesarias como xa fixemos cos actos vandálicos contra o monumento aos asasinados no Alto de Concheira”.
Lembramos que os paneis desta mostra apareceron nalgúns casos arrincados e noutros con rachaduras feitas cun coitelo ou obxecto cortante, quedando moitos dos cubos completamente inservibles.
A alcaldesa Digna Rivas expresou o seu malestar tras o achado desta acción que “condenamos firmemente, pois estes actos alteran e enturbian os elementos públicos, de memoria histórica ou de igualdade de xénero. Como é o caso da exposición Conquistadoras, unha mostra que representa o compromiso deste Concello con todas as mulleres que loitaron polos seus dereitos”.
Unha condena á que se sumaron tamén dende a Agrupación de Electores de Redondela así como a Asemblea Feminista Paxaretas quen insisten en que se trata de “actos misóxinos e non actos vandálicos” porque buscan agredir ás mulleres.
