A SD Pazos FS de Terceira nacional completou a súa primeira semana de traballo. A pretemporada do conxunto pacense comezou logo dun verán no que tan só houbo unha baixa. O oco que deixa Mario Paz, que fichou polo Stellae de Padrón de Segunda B, complétanos dúas caras novas coas fichaxes de Xandre, procedente do CD Beade, e Fredo, ex do Campito Chapela. Fran Amoedo está convencido de que van achegar “cousas moi boas” ao equipo.
Amoedo fai estas declaracións como Director Técnico do club, logo de seis exitosas temporadas como adestrador. Xunto ao seu segundo, Adri Fernández, decidiron deixar o banco e dar “un paso a un lado” para centrarse na parcela da dirección deportiva.
Para substituílos chega Alberto Matilla, técnico vigués con pasado no Leis Pontevedra e no CD Beade. Xunto con Antonio Cernadas como segundo adestrador e Kuka como adestrador de porteiros será o encargado de guiar á SD Pazos a pelexar de novo por un ascenso que quedou moi preto a pasada campaña. Amoedo sinala que Matilla era “a primeira opción do club” e que as conversas co técnico foron “moi doadas”.
O equipo xa coñece o calendario do inicio de temporada. O sábado, 26 de agosto, debuta en Copa Galicia cun interesante derbi comarcal na casa do FS Redondela. O gañador da eliminatoria enfrontarase o sábado 2 de setembro ao IES Coruxo de Segunda B na segunda rolda da copa autonómica . O día 9 de setembro chegará un día histórico para o clube, xa que debutará en Copa do Rei cun encontro en Pazos ante os asturiamos do San Cucao. O sábado 16 será o debut ligueiro, cando reciben na casa ao Sport Sala Culleredo.
