Os deportistas do club organizador fixéronse con catro medallas en diferentes categorías, entre elas dúas pratas para a amazona redondelá Mara Comesaña na categoría infantil e o xinete David Alonso na categoría de adultos. A competición reuniu nas instalacións do club no barrio do Coto en Cesantes a 68 deportista, o que supón duplicar o número de participantes da edición anterior.
Catro categorías forman parte do programa deste Campionato Galego ás que hai que engadir a proba de ponis. Un concurso completo de equitación moi esixente tanto cos cabalos como cos xinetes xa que teñen que enfrontarse a tres probas diferentes: doma clásica, salto en pista e proba de cross, na que os participantes teñen que superar diferentes obstáculos fixos.
Un deporte que nos últimos tempos ante a proliferación dos clubs hípicos na nosa bisbarra, entre eles o de Cesantes, fixo que un elevado número de persoas se sumara á práctica da hípica. Dende nenos e nenas que optan por esta modalidade nas súas actividades extraescolares –principalmente rapazas- pero tamén xente que busca competir ou xente de maior idade que se anima a achegarse a este deporte.
Entre as actividades que realizan nesta hípica atópase tamén este campionato galego que celebraba a súa quinta edición en Galicia e que supuxo un esforzo importante na súa organización. O elevado número de participantes en pista, así como de público asistente deixou no Club un bo sabor de boca polo que non descartan repetir en vindeiros anos. Tamén amosan a súa satisfacción cos resultados deportivos, xa que se levaron catro medallas nas diferentes categorías, con dous redondeláns destacados, Mara Comesalla que se fixo coa prata na categoría infantil e o propio Davi Alonso que tamén foi quen de subir ao podio para recibir a medalla de prata na categoría de adultos.
