Os asaltantes fuxiron tras saltar a alarma
Dous locais de Redondela – restaurante Illa de San Simón en Cesantes e Tapería Patri en Cedeira- rexistraron na noite do sábado para o domingo a entrada ilegal nas súas instalacións. Os asaltantes tan só lograron facerse cos cartos da máquina no primeiro dos locais mentres que marcharon coas mans baleiras da Tapería Patri, segundo informan dende a Policía Local.
Os feitos terían lugar na madrugada deste domingo cando un ou varios individuos entraron en dous locais de hostalaría que se atopan á beira da estrada. Así, no caso da Tapería Patri os asaltantes chegaron a entrar no local pero ao saltar a alarma decidiron darse á fuga.
Non así no restaurante Illa de San Simón, local ubicado no cruce da N-550 en Cesantes coa estrada do Viso, a onde os ladróns accederon tamén de madrugada levándose os cartos da máquina así como os décimos da lotería que había no local.
Ambos feitos foron denunciados nas dependencias da Policía.
