Un total de catro obras pasarán polo Multiúsos do Piñeiral dentro dun ciclo organizado pola Asociación cultural de Chapela en colaboración coa Concellería de cultura. A primeira das citas será este sábado 13 coa comedia “Melocotón en almíbar” adaptación da obra de Miguel Mihúra a cargo da Escola de Teatro Rosalía de Castro. As actuacións serán en catro sábados consecutivos ás 20:00 horas con entrada de balde.
Este ciclo de teatro foi posto en marcha hai dez anos pola Asociación cultural e Social de Chapela co obxectivo de fomentar esta arte escénica na parroquia, e ao mesmo tempo suplir a carencia deste tipo de representacións en Chapela. Unha idea que desde o principio recibiu o apoio da concelleria de cultura de Redondela e que nos últimos ano ten acadado unha gran acollida entre o público con aforamento completo en todas as representacións.
Un respaldo do público que os animou a ir ampliando o ciclo cada ano e incrementando o número de actuacións.
O programa arranca este sábado coa Escola de Teatro Rosalía de Castro e a obra “Melocotón en Almibar”, unha comedia na que non faltará o misterio. A segunda das propostas chegará o sábado 20 co grupo de teatro Eche o que hai e a obra “A verdadeira Historia da borrallenta”.
O sábado 27 Teatro Fauno interpretan “Os Veciños do lado” e pechará o ciclo a compañía A Moura, de Chain Gondomar, coa actuación “O vestido da noiva” o sábado 3 de Febreiro.
