A alcaldesa de Redondela, Digna Rivas, e o director do Conservatorio Superior de Música de Vigo ( CSMV), Esteban Valverde, asinaron un acordo entre ambas institucións “para a programación conxunta de actividades culturais como concertos, cursos ou conferencias”.
Rivas destacou que o Concello de Redondela ten entre as súas funcións “a promoción da cultura de Galicia e, en particular, o fomento de actividades que poñan en valor o patrimonio material e inmaterial do municipio”. Con este convenio a veciñanza de Redondela poderá gozar de actividades promovidas conxuntamente co Conservatorio vigués como concertos e recitais do seu alumnado no Multiúsos.
Esteban Valverde valorou positivamente o acordo pola súa achega para a promoción e difusión do coñecemento e da cultura”.
Con este convenio afirma a alcaldesa “complétase a xa de por si ambiciosa oferta musical para a cidadanía de Redondela que conta cunha ampla programación do Conservatorio Municipal Víctor Ureña e da Escola de Música de Chapela”.
