A campaña da Xunta de Galicia “O teu mellor verán” organiza un campamento na Illa de San Simón no que está a desfrutar de actividades culturais 30 mozos e mozas entre os 13 e os 16 anos.
O campamento chamado “A Illa das historias” ten unha duración dunha semana, finalizando o vindeiro sábado, e os participantes están a desenvolver propostas de educación ambiental, arte, cultura e historia aproveitando a singularidade deste enclave natural da ría de Vigo. Neste senso, teñen a oportunidade de tomar parte en actividades náuticas, obradoiros para o coñecemento da tradición marítimo-pesqueira local, talleres artístico-literarios ou de desfrutar de tempo de lecer na praia e con distintos xogos.
Dentro da súa programación de verán para a xuventude, a Xunta ofertou no que se refire á modalidade de campamentos en instalacións da provincia de Pontevedra un total de 1.965 prazas.
