O VI Aberto de Tenis e Pádel Memorial Sesé López. que arrincou o pasado día 26 de agosto e rematou o domingo 1 de setembro, acolleu 170 deportistas nas pistas municipais de Redondela. A competición está organizada pola Concellería de Deportes e o Club de Tenis e Pádel de Redondela e suman xa seis edicións cunha evolución moi positiva.
A competición acolleu a deportistas de toda Galicia, como Vigo ou Santiago de Compostela, e dende a directiva sinalan a boa relación cos clubs A Montesiña e a Asociación Deportiva de Tenis e Pádel de Soutomaior que “sempre participan e colaboran con nós, ademais de recibirnos no seu propio torneo municipal desde o compañeirismo”. Fran Iglesias, da organización, considera o torneo “un éxito”. “Cada ano vai crecendo e superamos o número de participantes, tendo que ir sumando categorías novas e sempre coa pena de que quede xente fóra”, explica Iglesias.
O técnico destaca o partido final de 1ª feminina entre as parellas de pádel Inés e Raquel e Sara Lorenzo e Rita Pena porque “foi moi igualada e fala moi ben do deporte feminino que temos en Redondela. Este foi un dos momentos máis emocionantes da competición”. As gañadoras foron finalmente Sara Lorenzo e Rita Pena.
Despois da entrega dos trofeos tivo lugar un sorteo grazas ás doazóns dos patrocinadores, a maioría do tecido comercial de Redondela, e a axuda do Concello. Entregaron, entre outros, unha cea no restaurante Vila Rosa, cestas con obsequios da Farmacia de Reboreda e produtos da Tía Estebana, un bono de masaxes a cargo do Policlínico Redondela, un brunch en Anaquel, palas de xogo de Drop Shot e distintos lotes de material deportivo.
Houbo momento tamén para exhibicións a cargo dos xogadores da base da categoría sub15, coa intención de mostrar a capacidade dos nosos deportistas e co obxectivo de engadir este rango de idades de cara a próximos torneos se hai suficiente xente interesada. A canteira do club redondelán promete, pois segundo Iglesias “levan dende pequenos adestrando e veñen con forza, polo que demostraron na exhibición un gran nivel”.
O Club de Pádel e Tenis de Redondela dedicase a dar clases de iniciación e perfeccionamento para todas as idades, así como impulsar a participación en competicións, torneos e eventos. Nestes momentos contan con tres equipos federados en Pádel en distintos niveis – Masculino A 3ª, Masculino B 4ª, Femenino 3ª – e en Tenis outros tres que tamén compiten a nivel galego – Veteranas + 35, Veteranos + 35. Veteranos + 60 masculino – co desexo de cara a tempada que vén de chegar aos play-off.
Agradecen ao Concello de Redondela, en especial ao Concelleiro de Deportes Iván Valles, polo seu apoio; aos patrocinadores que foron medrando cada ano e axudan de forma desinteresada; aos deportistas, que con deportividade e humanidade crearon un ambiente incrible tanto dentro como fora da pista; a todos os que se achegaron a empaparse de moito tenis e pádel e aos voluntarios e voluntarias que fan posible esta competición anual.
GAÑADORES DA COMPETICIÓN
Pádel:
1ª Mascu
Esteban Cernadas e Viñuela
2ª Masculina
Abel Boullosa e Brais Boullosa
3ª Masculina
Felipe e Gerardo Ramallo
Mixto
Jorge Cabanelas e Lara P
1ª Femenina
Sara Lorenzo e Rita Pena
2ª Femenina
Soraya A e María del Cueto
3ª femenina
Maria J Rego e Rocío G
Tenis:
1ª Masculina:
Roberto Montes
Dobres Masculino:
Pérez e Reino
Dobres feminino:
Carrera e Varela
Dobres Mixto:
Carrera e Lamas
