O goberno local confía en que este servizo comece a funcionar a vindeira semana logo de asinar un convenio co sector do taxi. O obxectivo do mesmo é dar resposta a un problema que afectaría a medio cento de rapaces e rapazas que, unha vez comezan a cursar bacharelato, deixan de ter garantido o transporte escolar por parte da Xunta de Galicia. Alumnado que non conta tampouco cun servizo de liña regular que lles permita desprazarse dende as parroquias aos institutos Pedro Floriani e Mediño nun horario que se adapte aos seus horarios lectivos.
A alcaldesa de Redondela, Digna Rivas, lembra que o goberno local decide asumir este servizo “competencia exclusiva da Xunta” por responsabilidade e ante as dificultades de moitas familias para conciliar e levar aos seus fillos e fillas aos centros “sendo o único concello da provincia que pon en marcha un convenio destas características que permitirá que ningún neno de bacharelato, quede sen un transporte gratuíto ao seus respectivos Institutos”.
O obxectivo é que todos alumnos de bacharelato vivan na parroquia na que vivan e “aos que a Xunta non lles garante unha praza nos autobuses escolares” conten con este servizo de taxi o antes posible.
Rivas agradece ao sector da taxi a súa boa disponibilidade á hora de facilitar a sinatura dun convenio que se está ultimando e que depende tan só de determinar o número de alumnos que precisarían deste traslado “son cifras moi difíciles de concretar, estimamos que sobre 40 ou 50 alumnos de Floriani e o Mendiño”.
Digna Rivas traslada unha mensaxe de tranquilidade ás familias e asegura que “en cuestión de días comezará xa ese servizo de taxis de cuxo funcionamento se informará a todos os afectados e aos propios centros educativos”
Conclúe Rivas afirmando que ao tratarse dun servizo que é de competencia supramunicipal, desde o Concello continuarase en contacto coa Consellería de Ensino e coa Consellería de Mobilidade para dar solución ás necesidades do alumnado de Redondela.
