Co gallo do Día Mundial da Saúde Mental que se conmemora cada 10 de outubro, a Asociación Lenda organiza diferentes actos para visibilizar a enfermidade e reivindicar a necesidade dunha mellor atención neste eido. Este ano tiveron que adiar algunhas das actividades por mor da choiva o que obrigou a facer a presentación da nova edición da Revista “Voces de Lenda” titulada “Resistencia” e a lectura do manifesto no día de hoxe.
O venres 11 de outubro celebraron o Regueifa tour 24-25 no Multiúsos da Xunqueira co lema “Regueifa, Retranca e Revoluçom”. Os actos que tiñan previsto celebrar o 10 de outubro adiáronos ata hoxe, saíndo a rúa para ler o seu manifesto e convidar á veciñanza a un café con rosca na praza de Alejandro Otero. Alí, presentaron a Revista nº44 de “A Voz de Lenda” que cumpre xa 25 anos. O nome escollido foi “Resistencia”, unha palabra con moito significado na súa loita polos dereitos das persoas no ámbito da Saúde Mental e que se repetiu ao longo dalgún dos textos desta edición escollidos para a lectura.
O manifesto deste ano leuno Sergio e nel reivindicaron a Saúde Mental como un dereito inherente a condición humana e que non entende de barreiras nin fronteiras. A OMS alerta de que un 25 % da poboación terá unha enfermidade mental ao longo da súa vida, pero dende Lenda explican que “isto non son números, son persoas coma ti e coma min”. Entende a data como unha oportunidade para reflexionar sobre a importancia da Saúde Mental e loitar polos recursos necesarios e a desigualdade social.
O traballo de Lenda en 2024 viuse reforzado coa contratación dunha educadora social e unha traballadora social a través do programas de cooperación da Xunta de Galicia e coa implementación da aplicación subvencionada co Kitt Dixital. Un ano máis tecnolóxico, no que crearon o proxecto Alfabetic co obxectivo de reducir a fenda dixital entre as persoas con Trastorno Mental Grave usuarias dos Centros de Rehabilitación Psicosocial e Laboral, Centro Ocupacional e programas da Asociación Lenda. A iniciativa pretende lograr unha cohesión social garantindo o dereito fundamental das persoas que sofren exclusión social a vivir con dignidade e desempeñar un papel activo na sociedade, para logralo na actualidade é imprescindible adquirir competencias dixitais básicas.
