O club de balonmán As Choqueiras de Redondela completou todas as categorías esta tempada, dende benxamín ao recentemente creado equipo sénior que debuta este sábado no Pavillón Municipal de A Marisma contra o Bueu ás 20.30 horas.
O equipo sénior está composto por 15 xogadoras e o adestrador é Julian Decu que ven de adestrar as cadetes e segue adestrando ao equipo de infantil masculino. A fin de semana pasada xogaron contra o BM Brigantium e a pesar de perder este primeiro partido, cun resultado de 43-37, dende a directiva a secretaria e coordinadora Deborah Bouzón asegura que “as sensacións son moi boas e están coñecéndose no campo, pois aínda teñen que adaptarse a xogar xuntas”. Con todo, seguirán loitando e auguran unha moi boa tempada.
O obxectivo, segundo explica Bouzón, é ascender á Primeira Autonómica “ se non pode ser este ano será o seguinte”. Non teñen presa e van a bo ritmo, sempre con positividade e entendendo con empatía todo os problemas que se podan atopar polo camiño.
Agradecen aos patrocinadores, aos país e nais involucrados no club que son un gran apoio para o club e sen eles non poderían facer fronte aos gastos que supón un club en crecemento con máis de 120 fichas actualmente. “A Garina colaborou no segundo equipamento que é rosa mantendo as nosas cores. Agradecemos enormemente á panadería redondelán a súa aportación”, sinala a coordinadora.
Animan á afección a achegarse o próximo sábado ao Pavillón Municipal de A Marisma para animar ás deportistas no seu debut na casa contra o Bueu.
