O Círculo recreativo de Chapela ten en marcha ata o vindeiro 22 de decembro dúas iniciativas solidarias que buscan por unha banda recoller xoguetes que serán entregados a dúas asociacións que se encargará de facerllas chegar a nenos e nenas. Tamén recollen alimentos para animais para axudar a protectora de Tui. Por outra banda teñen en marcha un campamento de Nadla que se desenvolverá do 23 de decembro ao 3 de xaneiro.
Os xoguetes recollidos serán entregados ás asociacións Amigos Moteiros e Sonrisas e renos que serán os encargados de facerllos chegar a nenos e nenas. Tamén colaboran activamente coa protectora Aloia de Tui cunha recollida de alimentos para animais como latas de comida para cans, snacks, salchichas ou penso.
Por outra banda está aberto o prazo de inscrición para o campamento de Nadal que se desenvolverá de 23 decembro ao 3 de xaneiro. O obxectivo é facilitar a conciliación laboral e familiar e ofrecer aos cativos, nenos e nenas de entre 3 e 12 anos un espazo no que gozar de diferentes actividades dende as nove da mañá ata as 14:00 horas. Entre as actividades previstas nas que participaran os rapaces está a cabalgata real, busca do tesouro, xincanas, festa fin de anos e obradoiros variados. O prezo é de 90 euros o campamento completo para os socios (110 os non socios) e posibilidade de asistir días soltos cun prezo de 14 euros socios e 26 os non socios. A inscrición pode realizarse no teléfono 680 13 07 05.
Un Círculo que continúa co seu programa Un mar de historia e que este venres a partir das 17:00 horas, contaran coa visita de Enrique Paredes e Manolo Solla, do Clube de persoas xubiladas de Domaio, quen levarán a cabo un Coloquio con todas aquelas persoas que queiran achegarse á cantina da entidade para lembrar como se trasladaban as persoas entre as beiras da ría antes da ponte de Rande, así como as historias dunha época e as súas anécdotas. As persoas asistentes poderán tamén gozar da exposición gráfica de embarcacións tradicionais galegas, colgada na cantina do local.
