Foto de Iria Iglesias: Maneiro nunha actuación en Redondela.
O cantante Javi Maneiro presenta o seu novo sinxelo en solitario titulado “Anxos no Inferno”, unha peza que marca un punto de inflexión na súa carreira e na súa vida persoal. O artista, que rematou de gravar a súa nova proposta influenciado por unha experiencia concreta en Redondela, asegura que nesta localidade “volveu a nacer” tras o duro golpe de saúde que atravesou, un proceso que lle deu un novo enfoque á súa música e ao seu camiño artístico.
“Anxos no Inferno” destaca non só pola súa intensidade sonora, onde a forza do rock se funde coa melódica do pop, senón tamén pola profunda carga emocional que transmite. A canción, escrita e composta por Maneiro, contou coa produción de Fran Gude e os arranxos de Rubén Cores, e está impregnada de agradecemento e reflexión. Na súa letra, o artista rememora as experiencias que marcaron o seu renacemento, dedicando palabras especiais ás persoas que foron clave no seu proceso, como a súa nai e a súa avoa. Ademais, fai un recoñecemento sincero ao labor dos sanitarios e sanitarias, destacando a súa capacidade para ofrecer un sorriso incluso nas circunstancias máis difíciles nos hospitais, un xesto que, segundo Maneiro, pode ser unha verdadeira luz no medio da escuridade.
