A presidenta da Asociación, a médico pediatra Pilar Martínez fai un chamamento para que todos os veciños colaboren “non necesariamente con achegas económicas xa que a axuda pode ser de múltiples xeitos” cun país que se atopa nunha situación moi complexa, cun elevado índice de mortalidade infantil, de malnutrición e de analfabetismo.
De feito, Martínez lembra que comezaron colaborando na zona con proxectos exclusivamente sanitarios achegándolle medicación gratuíta a aqueles que a precisaban e desenvolvendo actividades formativas para mellorar a cualificación do persoal sanitario local pero que agora, e grazas tamén ao incremento das colaboracións, están a traballar tamén en proxectos agrícolas e educativos. Os seus proxectos máis inmediatos levaranos novamente ao Senegal o día 1 de outubro. Ademais de médicos e enfermeiros irán acompañados nesta ocasión por profesionais da arquitectura quen se comprometeron a colaborar coa ONG para construír unha escola onde os nenos poidan recibir clases, xa que actualmente non teñen esta posibilidade por carecer dun centro educativo nas proximidades. Tamén prevén a construción dunha horta e unha granxa escola que melloraría a calidade de vida dos habitantes da zona. Nas vindeiras semanas a ONG ten previsto desenvolver actividades informativas en Redondela, coa colocación de stands aproveitando a celebración da festa do Choco e da Coca así como a multitudinaria presenza de público co gallo do Festival Internacional de Títeres.
Os primeiros proxectos era exclusivamente sanitarios
A construción dunha escola e dunha granxa atópanse entre os proxectos máis inmediatos
